ესტონეთის საგარეო საქმეთა მინისტრი, ევა-მარია ლიმეტსი აცხადებს, რომ შვედეთისა და ფინეთის ნატო-ში გაწევრიანება გაზრდის ბალტიის რეგიონის უსაფრთხოებას.

„როდესაც ვხედავთ, რომ ჩვენს სამეზობლოში სხვა დემოკრატიული ქვეყნებიც მიეკუთვნებიან ნატო-ს, ეს ნიშნავს, რომ შეგვიძლია გვქონდეს უფრო ფართო ერთობლივი წვრთნები და ასევე თავდაცვის სფეროში მეტი თანამშრომლობა“, - აღნიშნა ესტონეთის საგარეო უწყების ხელმძღვანელმა.

მან იმედი გამოთქვა, რომ შვედეთი, ფინეთი და თურქეთი გადალახავენ უთანხმოებას სკანდინავიის ქვეყნების ალიანსში გაწევრიანებასთან დაკავშირებით და დასძინა, რომ ბერლინის შეხვედრის ატმოსფერო ძალიან მხარდამჭერი იყო.

„ჩვენ ვნახეთ გარკვეული განსხვავებები, მაგრამ ასევე ვნახეთ ამ ქვეყნების მზადყოფნა, გადალახონ ეს განსხვავებები“, - აღნიშნა ევა-მარია ლიმეტსმა.