შვედეთმა და ფინეთმა უარყვეს თურქეთის მოთხოვნა 33 ადამიანის ექსტრადირებაზე, რომლებიც დაკავშირებული არიან „ქურთისტანის მუშათა პარტიასთან“ და გიულენისტურ ტერორისტულ დაჯგუფებასთან (FETÖ), - თურქული მედიiს ინფორმაციით, ამის შესახებ ქვეყნის იუსტიციის სამინისტრომ დღეს განაცხადა.
მათივე ინფორმაციით, თურქეთმა, ბოლო 5 წლის განმავლობაში, ფინეთიდან FETÖ-ს 6 და „ქურთისტანის მუშათა პარტიის“ 6 წევრის ექსტრადირება მოითხოვა, შვედეთიდან კი - „ტერორიზმში ეჭვმიტანილი“ 21 პირის.
სამინისტროს მტკიცებით, ორივე ქვეყანამ უარი თქვა 19 „ტერორისტის“ ექსტრადირებაზე, 5-თან დაკავშირებით პასუხი არ გაუცია, 9-ის ექსტრადირების პროცესი კი ჯერ კიდევ მიმდინარეობს.
შეგახსენებთ, ანკარაში აცხადებენ, რომ შვედეთისა და ფინეთის ნატო-ში შესაძლო გაწევრიანების მიმართ პოზიტიური დამოკიდებულება არ აქვთ, ვინაიდან აღნიშნული ქვეყნები „ტერორისტული ორგანიზაციების უსაფრთხო თავშესაფარს“ წარმოადგენენ.
აღსანიშნავია, რომ ნებისმიერ ქვეყანას, რომელიც ცდილობს ნატო-ში გაწევრიანებას, სამხედრო ალიანსის მოკავშირეების ერთსულოვანი მხარდაჭერა სჭირდება.