ავსტრალიაში საპარლამენტო არჩევნები მიმდინარეობს
ავსტრალიაში საპარლამენტო არჩევნები მიმდინარეობს, რომელიც განსაზღვრავს, რომელი პოლიტიკური ძალა იქნება ხელისუფლებაში და ვინ იქნება ქვეყნის შემდეგი პრემიერ-მინისტრი.
მედიის ინფორმაციით, მოსალოდნელია დაძაბული კონკურენცია მოქმედი პრემიერ-მინისტრის, სკოტ მორისონის „ლიბერალურ-ნაციონალურ კოალიციასა“ და ოპოზიციურ „ლეიბორისტულ პარტიას“ შორის, რომელსაც ენტონი ალბანეზა ხელმძღვანელობს.
ავსტრალიაში არჩევნებში მონაწილეობა 18 წლის ასაკიდან პირებისთვის სავალდებულოა და საარჩევნო კომისიის (AEC) ინფორმაციით, არჩევნებში მონაწილეობის მისაღებად 17.2 მილიონზე მეტი მოქალაქეა დარეგისტრირებული.
საარჩევნო კომისიის ცნობით, ამომრჩეველთა რეკორდულმა რაოდენობამ უკვე მისცა ხმა ხმის მიცემის წინასწარ გახსნილი ცენტრების ან ფოსტის საშუალებით. საარჩევნო უბნები მთელი ქვეყნის მასშტაბით ადგილობრივი დროით საღამოს 18:00 საათზე დაიხურება. „ლეიბორისტებმა” ან „ლიბერალ-ნაციონალურმა” კოალიციამ მთავრობის ფორმირებისთვის ქვედა პალატაში 76 მანდატი უნდა მოიპოვონ.
v-if="article.gallery" v-html="article.gallery"
