ირანი რევოლუციური გვარდიის პოლკოვნიკის, საიად ხოდაის სიკვდილის გამო შურს იძიებს, - ამის შესახებ ქვეყნის პრეზიდენტმა, ებრაჰიმ რაისიმ განაცხადა.

„დავთანხმდი, რომ ჩვენი უსაფრთხოების ძალებმა სერიოზულად ადევნონ თვალყური ამ საკითხს და ეჭვი არ მეპარება, რომ ჩვენი მოწამის წმინდა სისხლის გამო შურს ვიძიებთ,“- განაცხადა ირანის პრეზიდენტმა.

შეგახსენებთ, გუშინ გავრცელდა ინფორმაცია, რომ საკუთარ ავტომობილში მყოფ ირანის რევოლუციური გვარდიის ოფიცერს ორმა პირმა ცეცხლი გაუხნა და მოკლა. საინფორმაციო სააგენტო ISNA-ს ცნობით, მომხდართან დაკავშირებით გვარდიამ ისრაელის სადაზვერვო სამსახურის ქსელის წევრები დააკავა.