საქართველოს პარლამენტის ინფორმაციით, საზედამხედველო უფლებამოსილების განხორციელების ფარგლებში პარლამენტის ნდობის ჯგუფი საქმიანობას აქტიურად აგრძელებს.
მათივე ცნობით, ნდობის ჯგუფის ხელმძღვანელმა, ირაკლი ბერაიამ და ნდობის ჯგუფის წევრებმა, ალექსანდრე ტაბატაძემ და ანრი ოხანაშვილმა თავდაცვის უწყების და იუსტიციის სამინისტროს წარმომადგენლებს მოუსმინეს.
„ნდობის ჯგუფის ფორმატში დღეს ორი შეხვედრა გაიმართა. პირველ სხდომაზე თავდაცვის უწყების წარმომადგენლებს მოვუსმინეთ, რომლებმაც თავდაცვის სამინისტროს საიდუმლო შესყიდვების და იმ ფინანსური ასპექტების შესახებ ინფორმაცია წარმოადგინეს, რომელიც შეიარაღების და აღჭურვილობის მოდერნიზაციას, ინფრასტრუქტურის განვითარებას და იმ აქტივობებს უკავშირდება, რომლებიც თავდაცვის ძალების საბრძოლო მზადყოფნის ამაღლებას და ნატო-სთან თავსებადობის გაზრდას ითვალისწინებს.
სხდომაზე, ასევე, იუსტიციის მინისტრის მოადგილეს და სპეციალური პენიტენციური სამსახურის ხელმძღვანელს მოვუსმინეთ. მათ უწყების საქმიანობის იმ ნაწილის შესახებ წარმოადგინეს ინფორმაცია, რომელსაც გრიფით საიდუმლო ადევს", - განაცხადა ირაკლი ბერაიამ.