ავსტრიის კანცლერი, კარლ ნეჰამერი აცხადებს, რომ რუსეთის წინააღმდეგ ევროკავშირის სანქციების ახალ პაკეტში რუსული გაზის იმპორტზე ემბარგო არ შევა.

„გაზის ემბარგოს თემა არ იქნება, ამის შესახებ გერმანიის კანცლერმა ოლაფ შოლცმაც გარკვევით განაცხადა. რუსული ნავთობის კომპენსირება ბევრად უფრო ადვილია. გაზი სრულიად სხვაა“, - აღნიშნა ნეჰამერმა.

მან ასევე ხაზი გაუსვა, რომ ევროკავშირის მიერ რუსული ნავთობის იმპორტზე დაწესებული ემბარგო მტკივნეული იქნება როგორც მოსკოვისთვის, ასევე თავად ბლოკის წევრებისთვის.

„გადაწყვეტილება ნავთობის ემბარგოს დაწესების შესახებ არის ზომა, რომელიც, რა თქმა უნდა, თავისთავად მტკივნეული იქნება წევრი ქვეყნებისთვის, მაგრამ რეალისტები უნდა იყოთ. ეს ტკივილი არაფერია იმასთან შედარებით, რისი ატანაც უკრაინელ ხალხს უწევს”, - აღნიშნა ავსტრიის კანცლერმა.