საფრანგეთის პრეზიდენტმა ემანუელ მაკრონმა პირობა დადო, რომ უკრაინაში ფრანგი ჟურნალისტის ფრედერიკ ლეკლერკ-იმჰოფის მკვლელობის შემდეგ „დაუსჯელობის წინააღმდეგ იბრძოლებს“.

მანვე დასძინა, რომ რუსეთი ყველა საერთაშორისო კანონს არღვევს.

„ჟურნალისტები, ჰუმანიტარული მუშაკები დაცულნი უნდა იყვნენ საომარ ზონებში. მშვიდობიანი მოსახლეობა უნდა იყოს დაცული", - აღნიშნა საფრანგეთის პირველმა პირმა ბრიუსელში, ევროპული სამიტის შემდეგ საუბრისას.

საფრანგეთის ეროვნულმა ანტიტერორისტულმა პროკურატურამ ჟურნალისტის მკვლელობასთან დაკავშირებით გამოძიება ომის დანაშაულებებზე უკვე დაიწყო.

ცნობისთვის, ფრანგული ტელეკომპანია BFMTV -ის 32 წლის ჟურნალისტი ფრედერიკ ლეკლერკ-იმჰოფი, 30 მაისს, სევეროდონეცკის მახლობლად მიმდინარე ჰუმანიტარულ ოპერაციას აშუქებდა, რა დროსაც მას რუსული ჭურვის ნამსხვრევები მოხვდა, რის შედეგადაც ის გარდაიცვალა.