პროკურორი - გალიფ ოზთურქის ფინანსური და მატერიალური შესაძლებლობის გათვალისწინებით, არსებობს საფრთხე, რომ მან საქართველო დატოვოს და პასუხისმგებლობას თავი აარიდოს

გალიფ ოზთურქის ფინანსური და მატერიალური შესაძლებლობის გათვალისწინებით არსებობს საფრთხე, რომ მან საქართველო დატოვოს და პასუხისმგებლობას თავი აარიდოს, - ამის შესახებ ბათუმის საქალაქო სასამართლოში საქმის პროკურორმა, დავით ჭარბაძემ განაცხადა.

როგორც პროკურორმა აღნიშნა, გალიფ ოზთურქის მიმართ დამატებით საგამოძიებო მოქმედებები მიმდინარეობს. პროკურორი აღკვეთის ღონისძიების სახით გალიფ ოზთურქისთვის პატიმრობის შეფარდებას მოითხოვს.

„არსებობს საფრთხე თავის არიდების მიზნით ქვეყანა დატოვოს. გამოძიება რამდენიმე მუხლით მიმდინარეობს. კერძოდ: ყალბ საგადასახადო დოკუმენტებზე, უკანონო შემოსავლების ფაქტზე და უკანონო შემოსავლების ლეგალიზებაზე. გამოძიებით დასტურდება, რომ გალიფ ოზთურქს საქართველოს სხვადასხვა ტერიტორიაზე მიწის ნაკვეთები და შენობა - ნაგებობები აქვს რეგისტრირებული.

მიგვაჩნია, რომ გალიფ ოზთურქს მომავალში ახალი ბრალდება წარდგინება და თავისუფლებაში ყოფნის პერიოდში შესაძლოა, გამოძიებას არ მიაწოდოს რეალური ინფორმაცია, რაც ობიექტური ჭეშმარიტების დადგენას ხელს შეუშლის.

თავისუფლებაში ყოფნისას, დიდი ალბათობით, მტკიცებულებების განადგურება მოხდება. მიგვაჩნია, რომ გალიფ ოზთურქის ფინანსური შესაძლებლობების გათვალისწინებით შეუძლია საქართველოს ტერიტორია დატოვოს და არ დაბრუნდეს თავის არიდების მიზნით.

წარდგენილი ბრალდება სსკის 260-ე მუხლით, 8-დან 20 წლამდე ან უვადო პატიმრობას გულისხმობს. აღკვეთის ღონისძიების მიზნით პატიმრობას ვითხოვთ. საქმეზე მიმდინარეობს გამოძიება სხვა პირების მიმართაც“, - აღნიშნა პროკურორმა.