სულ მცირე 25 ადამიანი დაიღუპა და ასობით დაშავდა ბანგლადეშის ქალაქ ჩიტაგონგის მახლობლად მდებარე საწყობში მომხდარი ძლიერი აფეთქების შედეგად.

ადგილობრივი მედიის ცნობით, საწყობში ზოგიერთ კონტეინერში ქიმიური ნივთიერებები ინახებოდა.

თვითმხილველებმა საინფორმაციო სააგენტო „ფრანს-პრესს” განუცხადეს, რომ აფეთქებამ რამდენიმე კილომეტრის დაშორებით მდგარი შენობები შეარყია.

გავრცელებული ინფორმაციით, დაშავებულთაგან ბევრი მძიმე მდგომარეობაშია. ზოგიერთ მათგანს სხეულის 60%-დან 90%-მდე დამწვარი აქვთ. დაშავებულთა შორის არიან საწყობში დასაქმებული მუშები, ისევე როგორც მეხანძრეები და პოლიციელები.