„სტრატეგია აღმაშენებლის" და „რესპუბლიკური პარტიის" ლიდერები საფრანგეთის ელჩს საქართველოში, დიეგო კოლასს შეხვდნენ.
საფრანგეთის ელჩთან გამართულ შეხვედრაზე საუბარი საქართველოსთვის ევროკავშირის წევრობის კანდიდატის სტატუსის მინიჭებასთან დაკავშირებით გაიმართა.
"სტრატეგია აღმაშენებლის" ლიდერის გიორგი ვაშაძის თქმით, შეხვედრაზე ელჩის მხრიდან გაჟღერდა საფრანგეთის დამოკიდებულება ამ საკითხთან მიმართებაში.
ვაშაძის განცხადებით, საფრანგეთი საქართველოს და ქართველ ხალხს განიხილავს, როგორც ევროპული ოჯახის ნაწილს.
"შეხვედრა შედგა საფრანგეთის ელჩთან ბატონ დიეგო კოლასთან, საკითხი შეეხებოდა საქართველოსთვის ევროკავშირის წევრობის კანდიდატის სტატუსის მინიჭებას და პერსპექტივებს, საფრანგეთის ელჩმა გააჟღერა საფრანგეთის პოზიციები ამ საკითხთან მიმართებაში, დიეგო კოლასისგან მთავარი გზავნილი იყო, რომ საფრანგეთი საქართველოს და ქართველ ხალხს განიხილავს, როგორც ევროპული ოჯახის ნაწილს", - აღნიშნავს გიორგი ვაშაძე.