ომები სრულდება მოლაპარაკებების მაგიდასთან. თუმცა, რუსეთის უკრაინაში ომის შემთხვევაში მოლაპარაკებები, ცხადია, უახლოეს პერიოდში არ გაიმართება. ამიტომ, აშშ ყველაფერს გააკეთებს უკრაინის პოზიციების გასაძლიერებლად. ეს კომენტარი „უკრინფორმთან“ საუბარში ამერიკის სახელმწიფო მდივნის თანაშემწემ ევროპისა და ევრაზიის საკითხებში კარენ დონფრიდმა გააკეთა.

„ვფიქრობ, ჯო ბაიდენის კომენტარი იმაზე, რომ დიპლომატია დაასრულებს ომებს, ძალიან მნიშვნელოვანია. მან მოიყვანა პრეზიდენტ ზელენსკის ციტატა, რომელმაც თქვა, რომ ეს ომი დასრულდება დიპლომატიური გზით“, - განაცხადა დონფრიდმა თხოვნაზე, დაეზუსტებინა, როგორი პოზიცია უკავია აშშ-ს უკრაინაში ომის დასრულების საკითხში.

მისივე თქმით, პრეზიდენტმა ბაიდენმა ნათლად აღნიშნა, რომ აშშ აკეთებს ყველაფერს, რათა უკრაინის პოზიციები გაამყაროს, როდესაც ის მოლაპარაკებათა მაგიდას მიუჯდება.

„მაგრამ მე ვფიქრობ, რომ მოლაპარაკებათა ეს მაგიდა, სამწუხაროდ, არ წარმოადგენს უახლოესი პერიოდის საკითხს“ , - განაცხადა სახელმწიფო დეპარტამენტის წარმომადგენელმა.

ამავე კონტექსტში მან განაცხადა, რომ ჯერჯერობით, არავითარი ნიშნები არ ჩანს, რომ რუსეთი კეთილსინდისიერ დიალოგს აწარმოებს.

„უკრაინის ბრძოლა - ჩვენი ბრძოლაა. ეს არის ყველა ჩვენგანის ბრძოლა დემოკრატიისა და თავისუფლებისთვის. ჩვენ დავიკავებთ კურსს უკრაინელ ხალხთან ერთად, რადგან გვესმის, რომ თავისუფლება ტყუილად არავის ეძლევა“, - განაცხადა დონფრიდმა.