რუსეთის საგარეო საქმეთა სამინისტროს პრესსპიკერი, მარია ზახაროვა ე.წ. დონეცკის სახალხო რესპუბლიკის მიერ ბრიტანეთის მოქალაქეების მიმართ გამოტანილ სასიკვდილო განაჩენზე ბრიტანეთის რეაქციას „ისტერიულს“ უწოდებს.

მისი თქმით, როგორც გაერთიანებულმა სამეფომ, ასევე მაროკომ თავიანთ მოქალაქეებთან დაკავშირებით ე.წ. „დონეცკის რესპუბლიკის“ კომპეტენტურ სამსახურებს უნდა მიმართონ.

„რაც შეეხება კონკრეტულ დატყვევებულ ბრიტანეთის მოქალაქეებს, ლონდონს ვურჩევთ, გაუგზავნოს შესაბამისი მოთხოვნები დონეცკის რესპუბლიკის კომპეტენტურ ორგანოებს. ეს, რა თქმა უნდა, ეხება მაროკოდან დაქირავებულ მებრძოლსაც“, - განაცხადა ზახაროვამ.

შეგახსენებთ, რუსეთის მიერ კონტროლირებადი დონეცკის თვითგამოცხადებული სახალხო რესპუბლიკის ე.წ. სასამართლომ ბრიტანეთის ორ მოქალაქესა და მაროკოს ერთ მოქალაქეს სიკვდილით დასჯა მიუსაჯა. ე.წ. სასამართლომ სამივე უცხოელი სამხედრო „დაქირავებული მებრძოლების“ ბრალდებით გაასამართლა. ბრიტანეთის პრემიერ-მინისტრმა, ბორის ჯონსონმა განაცხადა, რომ ყალბი განაჩენით შეძრწუნებულია. მან მინისტრებს დაავალა, ყველაფერი გააკეთონ იმისთვის, რომ ბრიტანეთის მოქალაქეები თავიანთ ოჯახებს რაც შეიძლება მალე დაუბრუნდნენ.