კიევის ოლქში რუსი ოკუპანტები მოსახლეობისთვის სსრკ-ის პერიოდის პასპორტების დარიგებას გეგმავდნენ, - ინფორმაციას უკრაინული მედია უსაფრთხოების სამსახურზე დაყრდნობით ავრცელებს.

მათივე ცნობით, ამას მოწმობს ის მონაცემები, რომელიც სამხედრო კონტრდაზვერვამ მიიღო დამპყრობლების პოზიციებზე. გარდა ამისა, ამას ადასტურებს დამპყრობლების ქცევა უკრაინის იმ ნაწილებში, რომლებიც ახლა დროებით მათი ოკუპაციის ქვეშ არიან.

„კიევის ოლქის აღების შემთხვევაში რუსი დამპყრობლები გეგმავდნენ საოკუპაციო ადმინისტრაციის შექმნას და ფსევდორეფერენდუმის მოწყობას ადგილობრივი რესპუბლიკის გამოცხადებისთვის. მათ სურდათ ყველა მცხოვრებლის აღრიცხვა და უკრაინული დოკუმენტების სანაცვლოდ სსრკ-ის პასპორტების გაცემა - სულ მცირე, რუსეთის ფედერაციის დოკუმენტების გაცემამდე“, - ნათქვამია ინფორმაციაში.

უკრაინის უსაფრთხოების სამსახურის ცნობით, ქალაქ მაკაროვის მახლობლად ერთ-ერთ მიტოვებულ სახლში, მტრის საცავი აღმოაჩინეს, სადაც ყოფილი სსრკ-ის ასობით შეუვსებელი პასპორტი ინახებოდა.