თურქეთმა შავი ზღვის ფსკერზე ახალი გაზსადენის მშენებლობას ჩაუყარა საფუძველი. ცერემონიას ქვეყნის პრეზიდენტი რეჯეფ თაიფ ერდოღანი დაესწრო.

„ძალიან მოხარულები ვართ, რომ მივაღწიეთ კრიტიკულად მნიშვნელოვან სტადიას შავ ზღვაში გაზის მოპოვებასთან დაკავშირებით. 2023 წლის პირველ კვარტალში ჩვენი ეროვნული გაზის ტრანსპორტირების სისტემაში 10 მილიონი კუბური მეტრის ოდენობის ბუნებრივი გაზი გაეშვება. იმედი გვაქვს, რომ საქარიას გაზის საბადო მოპოვების პიკს 2026 წელს მიაღწევს“, - განაცხადა ერდოღანმა.

მისი თქმით, გაზის საბადოს გახსნა შავ ზღვაში ისტორიული მოვლენაა, რომელიც მთლიანად შიდა რესურსებით ხორციელდება.

„ენერგეტიკას ჩვენ განვიხილავთ როგორც რეგიონალური თანამშრომლობის გასაღებს და არა როგორც არენას, დაძაბულობისა და წინააღმდეგობისთვის“ , - განაცხადა ერდოღანმა.

თურქეთის პრეზიდენტმა შავ ზღვაში ბუნებრივი აირის საბადოს აღმოჩენის შესახებ განცხადება 2020 წლის 21 აგვისტოს გააკეთა. 2023 წლისთვის ხელისუფლება აირის მიწოდებას შიდა ბაზარზე გეგმავს. ერდოღანმა მაშინ აღნიშნა, რომ საქარიას საბადოზე 405 მილიარდი კუბური მეტრის ოდენობის ბუნებრივი აირის მარაგია.