ოპოზიციონერი დეპუტატის გრიგოლ ვაშაძის თქმით, ის განცხადებები, რომელსაც საქართველოს პრეზიდენტი სალომე ზურაბიშვილი აკეთებს კარგია, თუმცა, მისი თქმით, თუ ზურაბიშვილს დეპოლარიზაცია უნდა, მაშინ საქართველოს მესამე პრეზიდენტი უნდა შეიწყალოს.

ჟურნალისტის კითხვაზე, აპირებს თუ არა 16 ივნისს სალომე ზურაბიშვილის მიერ დაანონსებულ აქციაზე მისვლას, ვაშაძემ აღნიშნა, რომ აქციებზე ყოფნის თავისი წილი შესრულებული აქვს.

„ძალიან კარგია ის განცხადებები, რომელსაც ქალბატონი სალომე ზურაბიშვილი აკეთებს, მაგრამ იქიდან დავიწყოთ, რომ ამ თანამდებობაზე გაყალბებული არჩევნებით აღმოჩნდა ეს ქალბატონი. სანამ ამ განცხადებებს გააკეთებს კარგი იქნება ეუთოს ის 27 რეკომენდაცია წაიკითხოს, რომელმაც გამანადგურებელი შეფასება მისცა 2018 წლის არჩევნებს და არანაკლები იყო 2020 წლის არჩევნებზე გამოტანილი დასკვნა. ამასთან, თუ ამ ქალბატონს დეპოლარიზაცია უნდა და თუ უნდა, რომ ყველა პოლიტიკური ძალა ერთმანეთს ცივილიზებულად და ევროპულად ელაპარაკებოდეს, ამისათვის ის ბერკეტები გამოიყენოს, რომელიც კონსტიტუციით აქვს მინიჭებული, საქართველოს მესამე პრეზიდენტი შეიწყალოს, ან სხვა სამართლებრივი გზა მონახოს.

რაც შეეხება ხვალინდელ აქციას, ამაღამ მივფრინავ, ამიტომ ვერავითარ აქციებზე ვერ ვიქნები და მე ჩემი წილი აქციებზე დგომა მოვითავე",- განაცხადა გრიგოლ ვაშაძემ.