ჩვენ ბევრი მუშაობისთვის მზად ვართ და ევროპული საბჭოს მხარდაჭერის იმედი გვაქვს, - ასე ეხმაურება "ტვიტერის" გვერდზე მოლდოვის პრეზიდენტი მაია სანდუ ევროკომისიის მიერ მოლდოვისთვის ევროკავშირის კანდიდატის სტატუსის შესახებ რეკომენდაციის მინიჭებას.

მისივე თქმით, ეს ნაბიჯი მოლდოვისთვის "მხარდაჭერის ძლიერი სიგნალია".

"მხარდაჭერის ძლიერი სიგნალი მოლდოვასა და ჩვენი მოქალაქეებისთვის! ევროკომისიამ მოლდოვასთვის ევროკავშირის კანდიდატის სტატუსის მინიჭებას რეკომენდაცია გაუწია იმ გაგებით, რომ დამატებითი ძალისხმევა იქნება მიმართული უკვე დაწყებული რეფორმების გაგრძელებისკენ. ჩვენ ბევრი მუშაობისთვის მზად ვართ და ევროპული საბჭოს მხარდაჭერის იმედი გვაქვს", - წერს სანდუ.

შეგახსენებთ, ევროკომისია ევროპულ საბჭოს რეკომენდაციას აძლევს, უკრაინას და მოლდოვას ევროკავშირის წევრობის კანდიდატის სტატუსი მიანიჭოს, საქართველოსთან დაკავშირებით კი აცხადებს, რომ საკითხს კონკრეტული პირობების შესრულების შემდეგ დაუბრუნდება.