უკრაინა იმსახურებს ევროკავშირის კანდიდატის სტატუსს, – ამის შესახებ ლატვიის საგარეო საქმეთა მინისტრმა, ედგარს რინკევიჩსმა ევროკავშირის საგარეო საქმეთა მინისტერიალის დაწყებამდე განაცხადა.
„უკრაინა იბრძვის ევროპული ღირებულებებისა და თავისუფლებისთვის. თქვენ იხილეთ ასევე კომისიის ანგარიშიდან, რომ პროგრესი და რეფორმები საკმარისია ამ სტატუსის მისანიჭებლად“, – განაცხადა რინკევიჩსმა.
მისი თქმით, ეს ასევე ეხება მოლდოვასაც.
„ვფიქრობ, დღეს და ხვალ დისკუსიების დროს საბჭო შეძლებს მოემზადოს ლიდერების სამიტისთვის. ასევე ვიმედოვნებ, რომ იქნება გადაწყვეტილება, რომ ორივე ქვეყანას მიენიჭოს კანდიდატის სტატუსი. ვიმედოვნებ, რომ ერთობლივი მხარდაჭერა იქნება“, – განაცხადა ედგარს რინკევიჩსმა.