ხოშტარიები და მსგავსნი, ყველა არიან მეხუთე კოლონა, რომლებიც მუშაობენ, რომ ევროპული პერსპექტივა გაუქრონ ამ ქვეყანას, ვერ ეღირსებიან, ვერ მოესწრებიან, არასდროს რუსეთის ამ აგენტურას ხელისუფლებაში არ მოიყვანს ქართველი ხალხი, - ასე ეხმიანება საპარლამენტო უმრავლესობის წევრი ირაკლი ზარქუა ჟურნალისტებთან დღეს სამოქალაქო სექტორის მიერ პარლამენტთან დაგეგმილ აქციას “შინ ევროპისკენ".

ზარქუა მიიჩნევს, რომ ევროპული არჩევანი დამოკიდებული არ არის იმაზე, ქვეყანა მიიღებს თუ არა კანდიდატის სტატუსს.

“რადიკალურმა ოპოზიციამ, რომელიც ყველაფერში ცდილობს მოსინჯოს, რომ იქნებ არეულობა გამოუვიდეთ და ქაოსი და რევოლუცია მოახდინონ, ახლაც მცდელობა აქვთ, რომ სათავისოდ დაინახონ ეს. ევროპული ღირებულება, ევროპული არჩევანი ეს არ არის დამოკიდებული იმაზე, კანდიდატის სტატუსს მივიღებთ თუ არა, საქართველო იყო, არის და მომავალშიც იქნება ცხოვრების წესით, მრავალეთნიკურობით ადამიანის უფლებებით (ევროპული), ეს საუკუნეებით მოგვსდევს და ეს არც უგულავას, არც ბოკერიას და მით უმეტეს, არც რუსული ფულით დაფინანსებული ხოშტარიას გადასაწყვეტია. ეს არის ქართველი ხალხის ნება და ისტორიული მისია, რომ ძირძველ ევროპულ ოჯახს დაუბრუნდეს.

სიმართლე ერთია და როცა ამას მიაწვდი პარტნიორებს, გაიზიარებენ, არ გაიზიარებენ უგულავას ნარატივს, რომელმაც 40 მილიონი მოპარა დედაქალაქს და ერთ- ერთი შემოქმედი იყო იმ დიქტატურის, რაც სააკაშვილმა შექმნა. არ დაუჯერებენ ბუნებრივია, ბოკერიას, რომელიც არის ხერხემალი ამ უბედურების, რაც ქვეყანაში ტრიალებდა, არ დაუჯერებენ ხოშტარიას, რომელმაც თქვა, რომ მერე რა მოხდა რუსული ფული მემკვიდრეობით ერგო ჩემს ოჯახსო. შე დალოცვილო, სხვას რომ ამუნათებდით როცა ხელოვნებაში და სპორტში იყო ჩართული? ეს ორმაგი სტანდარტია, ახლა უკვე რცხვენია და სხვა ფორმულირება მოუძებნა, მილიონობით რუბლს რომ იღებს და ბათუმში უძრავ ქონებას ყიდულობს?!"- განაცხადა ზარქუამ.