რუსეთის უშიშროების საბჭოს ხელმძღვანელი, ნიკოლაი პატრუშევი ლიეტუვას ევროკავშირის მიერ სანქცირებული ტვირთის კალინინგრადისკენ სარკინიგზო ტრანზიტზე დაწესებული შეზღუდვების გამო „სერიოზული შედეგებით“ ემუქრება.

"რუსეთი აუცილებლად უპასუხებს ასეთ მტრულ ქმედებებს", - განაცხადა პატრუშევმა კალინინგრადში ჩატარებულ უშიშროების საბჭოს სხდომაზე.

მისი თქმით, "სათანადო ღონისძიებები" მუშავდება და უახლოეს მომავალში მიიღებენ.

„მათი შედეგები სერიოზულ უარყოფით გავლენას მოახდენს ლიეტუვის მოსახლეობაზე“, - აღნიშნა პატრუშევმა.

ლიეტუვის რკინიგზამ 18 ივნისს კალინინგრადისკენ რუსეთის იმ ტვირთების გატარება შეწყვიტა, რომლებზეც ევროკავშირის სანქციები ვრცელდება. აღნიშნულთან დაკავშირებით, ლიეტუვის საქმეთა დროებითი რწმუნებული ვირჯინია უმბრასენი, გუშინ რუსეთის საგარეო საქმეთა სამინისტროში დაიბარეს. გუშინვე, საგარეო უწყებამ გაავრცელა განცხადება, სადაც აღნიშნულია, რომ რუსეთი იტოვებს უფლებას, მიიღოს ზომები ეროვნული ინტერესების დასაცავად, თუ ლიეტუვა, უახლოეს მომავალში, სრულად არ განაახლებს ტვირთების ტრანზიტს კალინინგრადის ოლქისკენ. მომხდართან დაკავშირებით, საგარეო საქმეთა სამინისტროში დაიბარეს ევროკავშირის ელჩი, მარკუს ედერერიც.