„ქართული ოცნების“ თავმჯდომარე ირაკლი კობახიძის ინფორმაციით, მმართველ გუნდს ევროკომისიის დოკუმენტში წარმოდგენილ 12 რეკომენდაციაზე მუშაობა უკვე დაწყებული აქვს.

როგორც მან ჟურნალისტებთან საუბრისას განმარტა, ევროკომისიის მიერ ჩამოთვლილი თითქმის ყველა პუნქტი ასოცირების ხელშეკრულებაშიც იყო შეტანილი, შესაბამისად, მათ შესრულებაზე სრული მზადყოფნა გამოხატეს.

„ვერავინ ვერ ამბობს რომელ ვალდებულებას არ ვასრულებთ, ვალდებულებებს დღემდე ვასრულებთ და მანამდეც ვასრულებდით. რაც შეეხება რეკომენდაციებს რომელიც არის მოცემული ევროკომისიის დოკუმენტში, არის 12 რეკომენდაცია. ჩვენ ამაზე გამოვხატეთ მზადყოფნა, ასოცირების ხელშეკრულებაში იყო შეტანილი თითქმის ყველა პუნქტი, ეს იყო შეჯერებული ჩვენს და ევროკავშირს შორის. ჩვენ არამხოლოდ მზად ვართ, რომ ეს პუნქტები შევასრულოთ, არამედ მთელ რიგ პუნქტებზე უკვე დაწყებული გვაქვს მუშაობა, გამომდინარე აქედან, ყველაფერი დღესავით ნათელია“, - აღნიშნა ირაკლი კობახიძემ.

მან ასევე უპასუხა ჟურნალისტების შეკითხვას, რომელიც მმართველი გუნდის წარმომადგენლების მიერ დაგროვილ ქონებას და ბაკურიანში, პრემიერის ოჯახის საცხოვრებელ სახლთან მდებარე მიწის ნაკვეთს ეხებოდა.

„არავითარი ტყე იქ არ იყო, ოთხი ხე რომ დგას ეგ არის ტყე? ეს არის ტყული და თქვენი „ფეიკია“, სირცხვილია უბრალოდ“, - განაცხადა ირაკლი კობახიძემ.