ადამიანები აქციაზე გამოვიდნენ ევროპის მხარდასაჭერად და დახვდათ მიშა სააკაშვილის პლაკატები - როდესაც პოლიტიკური ძალა ცდილობს, მიითვისოს ის, რაც მას არ ეკუთვნის და ეკუთვნის ხალხს, ეს ამორალურია,- ამის შესახებ საქართველოს პრემიერ-მინისტრმა ირაკლი ღარიბაშვილმა პლენარულ სხდომაზე განაცხადა, სადაც დეპუტატების კითხვებს პასუხობს.
როგორც პრემიერმა აღნიშნა, წინა ხელისუფლებას საქართველოს ევროპული ინტეგრაციისთვის არაფერი გაუკეთებია.
„ევროპული იდეა არის ჩვენი მოსახლეობის აბსოლუტური უმრავლესობის არჩევანი. არა მხოლოდ იმ ადამიანების არჩევანია, ვინც აქციაზე გამოვიდნენ. ეს ადამიანები გამოვიდნენ აქციაზე ევროპის მხარდასაჭერად და დახვდათ მიშა სააკაშვილის პლაკატები, როგორ მოგწონთ?! მოსახლეობის 85% მხარს უჭერს ევროპულ იდეას. როდესაც პოლიტიკური ძალა ცდილობს, მიითვისოს ის, რაც მას არ ეკუთვნის და ეკუთვნის ხალხს, ეს ამორალურია, მითუმეტეს ამ ძალას არაფერი გაუკეთებია ჩვენი ევროპული მომავლისთვის. პირიქით, მათ ყოველდღიური მმართველობა საქართველოს ევროპას აშორებდა. ამ ადამიანებს ჩვენი ქვეყნის ევროპული ინტეგრაციის გზაზე არაფერი გაუკეთებიათ, არანაირი რეალური ხელშესახები შედეგი”,- განაცხადა ირაკლი ღარიბაშვილმა.