ლიეტუვის პრემიერი - საუბარი კალინინგრადის ბლოკადაზე სიცრუეა - ლიეტუვა ემორჩილება ევროკავშირის მიერ დაწესებულ სანქციებს
ლიეტუვის პრემიერ-მინისტრი, ინგრიდა სიმონიტე აცხადებს, რომ რუსეთის პრეტენზიები კალინინგრადის სარკინიგზო ბლოკადის შესახებ სიცრუეა.
”ნებისმიერი საუბარი კალინინგრადის ბლოკადაზე სიცრუეა. ლიეტუვა ემორჩილება ევროკავშირის მიერ რუსეთის მიმართ მისი აგრესიისა და უკრაინის წინააღმდეგ ომის გამო დაწესებულ სანქციებს, რომლებზეც ევროკავშირის წევრი ყველა ქვეყანა 15 მარტს შეთანხმდა,“- განაცხადა ლიეტუვის პრემიერმა.
მისი თქმით, იმ ტვირთის გატარება, რომელიც ევროკავშირის მიერ სანქცირებული არ არის, შეფერხების გარეშე ხდება.
„ყველა სხვა საქონელის, რომელიც აუცილებელია კალინინგრადის ოლქში მცხოვრებთათვის - საკვების, ფარმაცევტული პროდუქტების და ა.შ. - ტრანსპორტირება ხდება,“- აღნიშნა ინგრიდა სიმონიტემ.
შეგახსენებთ, ლიეტუვამ ევროკავშირის მიერ სანქცირებული საქონლის საკუთარი ტერიტორიის გავლით კალინინგრადისკენ გატარება აკრძალა. მოსკოვმა ეს ნაბიჯი „უკანონო ქმედებად“ შეაფასა და შესაბამისი ზომების მიღებით დაიმუქრა.
