გერმანიის საგარეო საქმეთა მინისტრმა ანალენა ბაერბოკმა რუსეთი "შიმშილის, როგორც ომის იარაღად" გამოყენებასა და "მთელი მსოფლიოს მძევლად აყვანაში" დაადანაშაულა. ინფორმაციას CNN აქვეყნებს.

გერმანიის პირველმა დიპლომატმა აღნიშნული განცხადება ბერლინში, იმ კონფერენციის დაწყებამდე გააკეთა, რომელიც უკრაინის ომის შედეგად გამოწვეულ სასურსათო კრიზისს ეხება.

კონფერენციას აშშ-ის სახელმწიფო მდივანი ენტონი ბლინკენიც ესწრება.

ბაერბოკმა ჟურნალისტებთან საუბრისას აღნიშნა, რომ ღონისძიება, სახელწოდებით "გაერთიანება გლობალური სასურსათო უსაფრთხოებისთვის", განიხილავს ომის შედეგად გამოწვეულ მომარაგების დეფიციტს და ის მიზნად ისახავს "მსოფლიოში სურსათის მარაგის სტაბილიზაციას".

კონფერენციას 50 დელეგაცია და მთელი მსოფლიოდან 40 მინისტრი დაესწრება.

როგორც გერმანიის საგარეო უწყების ხელმძღვანელმა აღნიშნა, უმთავრესი პრიორიტეტი სანდო სატრანსპორტო მარშრუტების შექმნაა, რათა უკრაინიდან მარცვლეულის ექსპორტი მოხდეს.

ცნობისთვის, დასავლეთმა რუსეთს მოსთხოვა შეწყვიტოს უკრაინის საზღვაო პორტების ბლოკადა და მსოფლიო ბაზრებზე მარცვლეულის დიდი მარაგები გატანის ნება დართოს.

მედიის ცნობით, სურსათის კრიზისთან დაკავშირებით, ბერლინის კონფერენცია იმ დროს ჩატარდება, როდესაც „დიდი შვიდეულის“ სახელმწიფოების ლიდერები ბავარიაში, 26-28 ივნისს დანიშნული შეხვედრისთვის ემზადებიან.