პრეზიდენტის მოტივირებული შენიშვნები ე.წ. მოსმენების კანონთან დაკავშირებით ბიუროს სხდომას წარედგინა. ბიუროს სხდომაზე საკითხი განსახილველად იურიდიულ საკითხთა კომიტეტს გადაეცა.
საუბარია “სისხლის სამართლის საპროცესო კოდექსში“ ცვლილებების პროექტზე, რომელსაც სალომე ზურაბიშვილმა ხელი არ მოაწერა და საკუთარი ვარიანტით პარლამენტს უკან დაუბრუნა.
რეგლამენტის გათვალისწინებით, პრეზიდენტის მოტივირებული შენიშვნები კანონპროექტის სახით არის ჩამოყალიბებული.
პრეზიდენტის მიერ მოტივირებული შენიშვნებით დაბრუნებული კანონი პარლამენტის პლენარულ სხდომაზე განიხილება და ერთი მოსმენით მიიღება. თუ პარლამენტი პრეზიდენტის შენიშვნებს არ მიიღებს, კენჭი კანონის პირვანდელ რედაქციას ეყრება, რომელიც მიღებულად ჩაითვლება, თუ მას მხარს პარლამენტის სრული შემადგენლობის უმრავლესობა დაუჭერს.
რაც შეეხება უშუალოდ “სისხლის სამართლის საპროცესო კოდექსში“ ცვლილებების პროექტს, უმრავლესობის მიერ მხარდაჭერილი ცვლილებების თანახმად, ფარული საგამოძიებო მოქმედებების მაქსიმალური ვადა 6 თვიდან 9 თვემდე იზრდება, ხოლო დანაშაულთა ჩამონათვალს, რომელზეც ფარული თვალთვალი შეიძლება განხორციელდეს, 27 ნაკლებად მძიმე დანაშაული ემატება. ამასთან, იცვლება ფარული საგამოძიებო მოქმედების ჩატარების შესახებ ინფორმაციის შესაბამისი პირისთვის შეტყობინების წესი.