საქართველოს პრემიერ-მინისტრი ქვეყნის ინტერესების დაცვას განსაკუთრებით კარგად ახერხებს ამ რთულ ვითარებაში - ის თავის პოზიციაზე მუშაობას გააგრძელებს,- ამის შესახებ ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა მთავრობის სხდომის დასრულების შემდეგ, ბრიფინგზე განაცხადა, რითაც უპასუხა კითხვას, აპირებს თუ არა პრემიერი გადადგომას.

დავითაშვილის თქმით, დღეს ქვეყნის ინტერესი სტაბილური განვითარების და მშვიდობის უზრუნველყოფაა, რასაც „მთავრობის ხელმძღვანელი ასრულებს“.

„დღეს ჩვენ ვსაუბრობთ ქვეყნის ინტერესების დაცვაზე და საქართველოს პრემიერ-მინისტრი ქვეყნის ინტერესების დაცვას განსაკუთრებით კარგად ახერხებს ამ რთულ ვითარებაში. ქვეყნის ინტერესია სტაბილური განვითარება, მშვიდობის უზრუნველყოფა და მეტი ეკონომიკური კეთილდღეობის შექმნა. ამ ამოცანებს საქართველოს მთავრობის ხელმძღვანელი ასრულებს, ის იქნება და თავის პოზიციაზე მუშაობას გააგრძელებს“,- განაცხადა ლევან დავითაშვილმა.