კულტურისა და მედიის დარგში გერმანელი მინისტრი კლაუდია როტი მიიჩნევს, რომ რუსული კულტურის ბოიკოტირება არასწორია. ამის შესახებ მან Augsburger Allgemeine-სთვის მიცემულ ინტერვიუში განაცხადა.

„აბსოლუტურად არასწორად მივიჩნევ ყველაფრის ბოიკოტირებას, რაც რუსულ კულტურას ეხება“,- განაცხადა მინისტრმა.

მან გაიხსენა შემთხვევა, როდესაც ერთ-ერთი ქალაქის მერმა ახალგაზრდულ ორკესტრს ჩაიკოვსკის დაკვრა აუკრძალა. მისი თქმით, შედგა საჯარო განხილვა, რომლის შემდეგაც კონცერტი დაუშვეს.

„მაგრამ, რა თქმა უნდა, დისკუსია გრძელდება. არსებობს დიდი განუსაზღვრელობა იმასთან დაკავშირებით, როგორ უნდა მოვექცეთ რუსულ კულტურას. ვფიქრობ, ბოიკოტი სრულებით არასწორია. არსებობს ასეთი დიდებული რუსული კულტურა, მუსიკა, ლიტერატურა, ანტონ ჩეხოვი. მე არ მივცემ პუტინს უფლებას, ჩეხოვი წამართვას“,- განაცხადა გერმანიის კულტურის მინისტრმა.