ბოდვებს ყურადღება არ მივაქციოთ, მით უმეტეს დეტალებს, თუ რას იტყვის ივანიშვილის მორიგი მასხარა. ეს ადამიანები არც ფაქტებს სცემენ პატივს, არც საკუთარ თავებს და არც საზოგადოებას , - ასე ეხმაურება „ევროპული საქართველოს“ თავმჯდომარე, გიგა ბოკერია „ქართული ოცნების“ თავმჯდომარის, ირაკლი კობახიძის დღევანდელ განცხადებებს.

მისი თქმით, უნდა ვფოკუსირდეთ მთავარ ამოცანაზე ამ ქვეყნის თავისუფლებასა და სამშვიდობოზე გასვლაზე.

„ივანიშვილი და ეს ხალხი ნიშნავს პუტინის ჭაობში ჩარჩენას და მათი მშვიდობიანი გზით მოშორება აუცილებელია იმისთვის, რომ ჩვენ ჩვენი მშვიდობიანი მისია შევასრულოთ. ამაზე უნდა ვიყოთ მხოლოდ ფოკუსირებულნი“, - განაცხადა გიგა ბოკერიამ.

ცნობისთვის, „ქართული ოცნების“ თავმჯდომარემ, ირაკლი კობახიძემ დღეს ბრიფინგზე აღნიშნა, რომ საზოგადოებამ დაინახა, რადიკალური ოპოზიციისთვის ევროკავშირის კანდიდატობის თემა მხოლოდ მოგონილი შირმა იყო და სინამდვილეში, ისინი ამ თემის გამოყენებით საკუთარი ვიწროპოლიტიკური მიზნის მიღწევას - ხელისუფლების გადატრიალებასა და ძალაუფლების ხელახლა ხელში ჩაგდებას ცდილობდნენ.