თუკი ვინმე ან რომელიმე პოლიტიკური ძალა საქართველოში ან მის ფარგლებს გარეთ ფიქრობს, რომ ბიძინა ივანიშვილის პოლიტიკაში შემოყვანის იძულება შეიძლება იყოს გზა საქართველოს ომში ჩართვისთვის, ასეთი მცდელობები უპერპექტივოა, - აღნიშნული განცხადება პარლამენტში “ქართული ოცნების“ დეპუტატმა მიხეილ სარჯველაძემ გააკეთა.
სარჯველაძის თქმით, ივანიშვილის პოლიტიკაში დაბრუნება მოსალოდნელი არ არის და ამის წინაპირობა და საჭიროება ობიექტურად არ დგას.
მისივე აზრით, ივანიშვილის პოლიტიკაში შესაძლო დაბრუნების თემაზე ოპონენტები საკუთარი დრამატული შეცდომების გადაფარვის მიზნით საუბრობენ.
“ბიძინა ივანიშვილი პირადად იქნება თუ არა ჩართული პოლიტიკაში, ეს არ იქონიებს გავლენას სტრატეგიულ მიმართულებაზე, რაც არის არამხოლოდ “ქართული ოცნების“ პოზიცია, არამედ საქართველოს მოსახლეობის ნება - საქართველოში მაქსიმალური ძალისხმევა ჩაიდოს და ყველაფერი გაკეთდეს იმისთვის, რომ ომი თავიდან იყოს აცილებული. ეს არის პრინციპული მიდგომა და უპირველესად საქართველოს ინტერესების სამსახურში დგომა. შესაბამისად, ამის გაცხადება, რა თქმა უნდა, მნიშვნელოვანია“, - განაცხადა სარჯველაძემ ჟურნალისტებთან საუბრისას.