შავ ზღვაში ნავიგაციასთან დაკავშირებით მოლაპარაკებები ხვალ სტამბოლში გაიმართება. ამის შესახებ დეტალებს უკრაინის პრეზიდენტის ოფისის ხელმძღვანელი ანდრეი ერმაკი თავის „ტელეგრამის“ გვერდზე ავრცელებს.
„სტამბოლში დაგეგმილია შეხვედრა უკრაინელ და თურქ წარმომადგენლებს შორის. ამის შემდეგ გაიმართება გაფართოებული შეხვედრა უკრაინას, თურქეთს, გაეროსა და რუსეთის ფედერაციას შორის, რომელზეც განიხილება საზღვაო დერეფნების ფუნქციონირების საკითხები მარცვლეულის ექსპორტისთვის“, - განაცხადა ერმაკმა.
მან ასევე აღნიშნა, რომ ამ მიმართულებით უსაფრთხოების საკითხი საკვანძოა.
„უკრაინულ პორტებზე ბლოკადის მოხსნა - ეს გლობალური სასურსათო უსაფრთხოების ერთ-ერთი საკვანძო შემადგენელია. ჩვენ ეს რაც შეიძლება სწრაფად უნდა გავაკეთოთ. მივიჩნევთ, რომ უკრაინული მარცვლეულის ექსპორტზე ბლოკადის მოხსნის საკითხი გაეროს ეგიდის ქვეშ უნდა განხორციელდეს. გაეროს გენერალური მდივანი ანტონიო გუტერეში ჩართულია ამ პროცესში, ჩვენ ამისთვის მადლიერები ვართ“,- განაცხადა ერმაკმა.