აშშ-ის საავიაციო თავდასხმის შედეგად, სირიაში „ისლამური სახელმწიფოს“ ერთ-ერთი ლიდერი ლიკვიდირებულია
ამერიკის შეერთებული შტატების საავიაციო თავდასხმის შედეგად, სირიაში ტერორისტული დაჯგუფება „ისლამური სახელმწიფოს“ ერთ-ერთი ლიდერი ლიკვიდირებულია.
ლიკვიდირებული ლიდერი მაჰერ ალ-აგალა ტერორისტული დაჯგუფების ლიდერების ხუთეულში შედიოდა.
ამის შესახებ ინფორმაციას „როიტერი“ ამერიკის შეერთებული შტატების საჰაერო ძალების სარდლობაზე დაყრდნობით ავრცელებს.
„ისლამური სახელმწიფოს“ ერთ-ერთი ლიდერი უპილოტო საფრენი აპარატიდან გასროლით სირიის ჩრდილო-დასავლეთ ნაწილში მოკლეს. კიდევ ერთმა, მაჰერ ალ-აგალასთან დაახლოებულმა მებრძოლმა, მძიმე დაზიანებები მიიღო.
„ეს ოპერაცია ძალიან ყურადღებით იყო დაგეგმილი, რათა მისი წარმატებით განხორციელება ყოფილიყო უზრუნველყოფილი. წინასწარი ანალიზი აჩვენებს, რომ ოპერაციას მშვიდობიან მოსახლეობაში მსხვერპლი არ მოჰყოლია", - ნათქვამია განცხადებაში.
ამასთან, განცხადებაში აღნიშნულია, რომ „ისლამური სახელმწიფო" ჯერ კიდევ წარმოადგენს საფრთხეს ამერიკის შეერთებული შტატებისა და მისი პარტნიორებისთვის რეგიონში.
