ევროკომისიამ ევროკავშირის წევრ ქვეყნებს აზერბაიჯანთან ბუნებრივი აირის იმპორტის გაზრდის შესახებ გარიგება შესთავაზა.ამასთან, ურსულა ფონ დერ ლაიენის უწყება ევროგაერთიანების სახელმწიფოებს აღნიშნულისთვის მილსადენის გაფართოების მხარდაჭერისკენ მოუწოდებს.
ინფორმაციას სააგენტო „როიტერსი“ ავრცელებს.
მათივე ცნობით, ურთიერთგაგების მემორანდუმის პროექტი, რომელიც ჩართული მთავრობების მხრიდან დამტკიცებას საჭიროებს და შესაძლოა კვლავ შეიცვალოს, უკრაინაში მიმდინარე ომის გამო, რუსულ გაზზე დამოკიდებულების შესამცირებლად ევროკავშირის ძალისხმევის ნაწილია.
გარდა ამისა, 11 ივლისით დათარიღებულ დოკუმენტში აღნიშნულია, რომ ევროკავშირი და აზერბაიჯანი ელექტროენერგიის დამაკავშირებელი ხაზების განვითარებას, ისევე როგორც წყალბადის სამომავლო ვაჭრობასაც განიხილავენ.
ცნობისთვის, ენერგეტიკის საკითხებში ევროკომისარი კადრი სიმსონი ივლისის ბოლოს აზერბაიჯანს ეწვევა.