უკრაინა ებრძვის რუსეთის უკანონო შეჭრას და სჭირდება იარაღი თავის დასაცავად. ევროკავშირი მატერიალურად უჭერს მხარს უკრაინის არმიას სრული ნდობით და სრული რწმენით, - ამის შესახებ ევროკომისარი შინაგან საქმეთა საკითხებში ილვა იოჰანსონი „ტვიტერზე“ წერს.

ამასთან, ევროკავშირის წარმომადგენელმა პიტერ სტანომ გუშინ განაცხადა, რომ ბლოკს არ აქვს მიზეზი, ეჭვი შეიტანოს უკრაინის მთავრობის ვალდებულებებში ევროკავშირის დახმარებით შესული იარაღის სწორად გამოყენებასა და აღრიცხვასთან დაკავშირებით.

მანამდე, რამდენიმე მედია საშუალებამ გაავრცელა ინფორმაცია, რომ ნატო და ევროკავშირი, სავარაუდოდ, შეშფოთებულები არიან უკრაინიდან იარაღის კონტრაბანდის გამო. ინფორმაცია ორივე ორგანიზაციამ უარყო.