რუსულმა ენერგეტიკულმა კომპანია „გაზპრომმა“ გერმანულ ჯგუფს, Siemens-ს კანადაში შეკეთებული ტურბინის დაბრუნების თხოვნით მიმართა.
„15 ივლისს „გაზპრომმა“ ოფიციალური მოთხოვნა წარუდგინა Siemens-ს, რათა დაუშვას პორტოვაიას სადგურის გაზის ტურბინის ძრავის ექსპორტი, რომელიც გაზსადენ „ჩრდილოეთ ნაკადის“ კრიტიკულ ობიექტს წარმოადგენს. „გაზპრომი“ იმედოვნებს, რომ Siemens-ის ჯგუფი უპირობოდ შეასრულებს თავის ვალდებულებებს გაზის ტურბინის ძრავების შეკეთებასა და რემონტთან დაკავშირებით, რასაც ეყრდნობა გაზსადენ „ჩრდილოეთ ნაკადის“ ოპერაციების შეუფერხებელი მუშაობა და ბუნებრივი აირის მიწოდება ევროპელი მომხმარებლებისთვის.“, - აცხადებენ კომპანიაში.
„გაზპრომმა“ ორშაბათს გაზსადენ „ჩრდილოეთ ნაკადი 1“-ის 10-დღიანი დაგეგმილი წლიური ტექნიკური სამუშაოები დაიწყო. რუსეთმა 60%-ით უკვე შეამცირა მილსადენ „ჩრდილოეთის ნაკადით“ მიწოდებული გაზის მოცულობა, რის მიზეზადაც ტურბინის არ ქონას ასახელებს. რუსეთის წინააღმდეგ დასავლეთის სანქციების მიუხედავად, კანადამ Siemens-ს უფლება მიანიჭა, რუსეთს "ჩრდილოეთის ნაკადი 1"-ის ტურბინა დაუბრუნოს.