რუსეთის თავდაცვის მინისტრმა სერგეი შოიგუმ შეიარაღებული ძალების „აღმოსავლეთის“ დაჯგუფების ინსპექტირებისას განაცხადა, რომ პრიორიტეტი უკრაინის შეიარაღებული ძალების შორ მანძილზე მოქმედი იარაღის განადგურება უნდა იყოს, - რუსული მედიის ინფორმაციით, ამის შესახებ თავდაცვის სამინისტროს პრესრელიზშია აღნიშნული.

„არმიის გენერალმა სერგეი შოიგუმ მეთაურს დაავალა, პრიორიტეტი მიანიჭონ მტრის შორ მანძილზე მოქმედი რაკეტების და არტილერიის განადგურებას, საიდანაც დონბასის დასახლებების საცხოვრებელი უბნების დაბომბვა, ასევე ხორბლის მინდვრებისა და მარცვლეულის შესანახი საწყობებისთვის მიზანმიმართული ცეცხლის წაკიდება ხორციელდება“, - აცხადებენ უწყებაში.

მათივე ცნობით, აღმოსავლეთის დაჯგუფების მეთაურმა, გენერალ-ლეიტენანტმა რუსტამ მურადოვმა მინისტრს მიაწოდა ინფორმაცია „მტრის ძალების დასამარცხებლად დაკისრებული საბრძოლო მისიების შესრულების კუთხით არსებული ვითარების შესახებ“.