უკრაინის სამხედრო დახმარების ახალი პაკეტი, რომელიც ამ კვირაში გამოცხადდება, ითვალისწინებს კიდევ ოთხ HIMARS სარაკეტო სისტემას და საბრძოლო მასალას, ამასთან ჰაუბიცებს. ამის შესახებ აშშ-ის თავდაცვის მდივანმა ლოიდ ოსტინმა უკრაინის თავდაცვის საკითხებში საკონტაქტო ჯგუფის მეოთხე შეხვედრის გახსნაზე განაცხადა.

„ჩვენ გავაგრძელებთ ისტორიული სამხედრო დახმარების გაწევას, რათა დავეხმაროთ უკრაინას თავდაცვაში. ამ კვირის ბოლოს გამოვაცხადებთ სამხედრო დახმარების შემდეგ პაკეტს იარაღით, საბრძოლო მასალისა და აღჭურვილობით უკრაინისთვის. ის მოიცავს კიდევ ოთხ HIMARS-ს, მოწინავე სარაკეტო სისტემას. უკრაინელები უკვე ძალიან ეფექტურად იყენებენ მას და დიდი განსხვავება შეინიშნება ბრძოლის ველზე“, - თქვა ლოიდ ოსტინმა.

აღნიშნული დახმარებით უკრაინისთვის მიწოდებული HIMARS-ის საერთო რაოდენობა თექვსმეტს მიაღწევს. პაკეტში ასევე შედის საბრძოლო მასალები არტილერიისთვის.

გამოსვლაში პენტაგონის ხელმძღვანელმა აღნიშნა, რომ უკრაინა თავისი მტკიცე წინააღმდეგობით უკვე ზედიზედ რამდენიმე თვეა მოსკოვის გეგმებს შლის, მაგრამ საფრთხე მაინც დიდია.

„ახლა არის ამ კონფლიქტის კრიტიკული ეტაპი. ჩვენი კოლექტიური მხარდაჭერა უკრაინის მიმართ სასიცოცხლო და გადაუდებელი მნიშვნელობისაა. რუსეთს სჯერა, რომ მას შეუძლია უკრაინაზე და ჩვენზე მეტხანს გაძლოს. მაგრამ ეს არის კიდევ ერთი არასწორი გათვლა რუსული არასწორი გათვლების სერიიდან. საკონტაქტო ჯგუფი გააგრძელებს შეიარაღებულ ძალებში მამაცი უკრაინელებისა და უკრაინელი ქალების გრძელვადიანი მხარდაჭერისთვის ინოვაციური გზების ძიებას. ჩვენ მოვარგებთ ჩვენს დახმარებას ისე, რომ უკრაინას ჰქონდეს საჭირო ტექნოლოგია, საბრძოლო მასალა საკუთარი თავის დასაცავად", - განაცხადა ლოიდ ოსტინმა.

როგორც ცნობილია, შეხვედრა ამჯერად ონლაინ იმართება.