ერაყის პარლამენტში არსებული შეფერხებების გამო, პროტესტის ნიშნად შიიტი სასულიერო პირის, მოქთადა ალ-სადრის მხარდამჭერები ბაღდადის პარლამენტის ცარიელ შენობაში შეიჭრნენ. ამის შესახებ ინფორმაციას Reuters-ი ავრცელებს.

მედიის ცნობით, პროტესტი გამოიწვია იმ ფაქტმა, რომ ქვეყანაში ოქტომბერში ჩატარებული არჩევნების შემდეგ კანონმდებლები პარლამენტში არ გამოჩნდნენ, რომელთაც ქვეყნის პრეზიდენტისა და პრემიერ-მინისტრის არჩევა ჰქონდათ დავალებული, რამაც გამოიწვია ის, რომ ქვეყანა 290 დღის განმავლობაში პრეზიდენტისა და კაბინეტის გარეშე დარჩა.

ამ დროისთვის, ქვეყანას ყოფილი პრემიერ-მინისტრი მუსტაფა ალ-ქადიმი მართავს, ხოლო თუ პარტიები ახალი მთავრობის არჩევაზე ვერ შეთანხმდებიან, ალ-ქადიმი აღნიშნულ თანამდებობაზე მომავალ არჩევნებამდე დარჩება.

ამასთან, როგორც Reuters-ი იუწყება, იმის გამო, რომ ერაყში მთავრობა არ არის არჩეული, ქვეყანა 2022 წლის ბიუჯეტის გარეშე დარჩა.