ირაკლი კობახიძე - ოპოზიცია ფიქრობს, რომ კანდიდატის სტატუსის მიღებით ხელისუფლება ქულებს ჩაიწერს და ყველაფერს აკეთებს, რომ ეს არ მოხდეს
ოპოზიცია ფიქრობს, რომ ევროკავშირის წევრი ქვეყნის კანდიდატის სტატუსის მიღებით ხელისუფლება ქულებს ჩაიწერს და ყველაფერს აკეთებს იმისათვის, რომ ეს არ მოხდეს, - ამის შესახებ პარტია „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა.
კობახიძის თქმით, საქართველოს ხელისუფლება პასუხისმგებლობით აგრძელებს მოქმედებას.
„მათ [ოპოზიციას] არ უნდათ, რომ საქართველომ კანდიდატის სტატუსი მიიღოს, ეს არის მათი პოზიციის ამოსავალი წერტილი. ყველაფერს აკეთებენ იმისთვის, რომ ამ პროცესის საბოტაჟი განახორციელონ, რომელიც ევროინტეგრაციას უკავშირდება, - ეს აჩვენებს მათ ბუნებას. ისინი ფიქრობენ, რომ კანდიდატის სტატუსის მიღებით, ხელისუფლება ქულებს ჩაიწერს და ყველაფერს აკეთებენ იმისათვის, რომ ეს არ მოხდეს. თუმცა ჩვენ, რა თქმა უნდა, მოქმედებას ჩვენი პასუხისმგებლობით გავაგრძელებთ და ეს პროცესი გაგრძელდება“, - განაცხადა ირაკლი კობახიძემ.
