რეალური საფრთხე დღეს კარს მოგვადგა და მუდმივად ჩვენთან ერთად არის რუსული იმპერიის სახით, პრობლემაა ჩვენი ხელისუფლების უმოქმედობა და არა ათასობით შემოსული რუსი, - ასე აფასებს „ევროპული საქართველოს“ წევრი აკაკი ბობოხიძე საქართველოში რუსეთის მოქალაქეების შემოსვლას.

აკაკი ბობოხიძის შეფასებით, ხელისუფლებასთან ერთად პრობლემას წარმოადგენს მოსახლეობის ის ნაწილიც, რომელიც მზად არის შეეგუოს დამპყრობელს და ენის მოჩლექით ელაპარაკება.

„პრობლემა არის საქართველოს ხელისუფლებაში, რომელიც არ იქცევა ადეკვატურად და იმის შესაბამისად, რა გამოწვევების წინაშეცაა დღეს ქვეყანა. პრობლემა არის მოსახლეობის ის ნაწილი, რომელიც შემგუებლურია რუსული საფრთხეების მიმართ მაშინ, როდესაც დანარჩენ მსოფლიოსთან აბსოლუტური მიუღებლობა აქვს. რეალური საფრთხე დღეს კარს მოგვადგა და მუდმივად ჩვენთან ერთად არის რუსული იმპერიის სახით, პრობლემაა ჩვენი ხელისუფლების უმოქმედობა და არა ათასობით შემოსული რუსი. რუსი ვერ იქნებოდა პრობლემა საქართველოს რომ ჰყავდეს ხელისუფლება, რომელიც არის ადეკვატური და ქვეყნის უსაფრთხოებაზე მოფიქრალი. პრობლემა ხალხის იმ ნაწილშია, რომელიც მზად არის შეეგუოს დამპყრობელს და ენის მოჩლექით ელაპარაკება, მაშინ როდესაც მეგობრებთან დიდ გულზე არიან, სადაც მუშტის მიღების შანსია მათთან იქცევიან როგორც მლიქვნელები და ადამიანები, რომლებიც მზად არიან ყველაფერი დათმონ თავისუფლების ხარჯზე“, - აღნიშნა აკაკი ბობოხიძემ.