დღეს როგორც არასდროს გაგვიჩნდა შანსი დანარჩენი მსოფლიო დღევანდელ პრობლემებთან ერთად დავაფიქროთ საქართველოსა და ქართველი დევნილების პრობლემებზე, - ამის შესახებ „ევროპული საქართველოს“ წევრმა აკაკი ბობოხიძემ პირველ გიმნაზიასთან გამართულ ბრიფინგზე აღნიშნა.

მისივე განცხადებით, დანარჩენ მსოფლიოს უნდა გავაგებინოთ, რომ პრობლემა არამხოლოდ პუტინში, არამედ რუსულ სახელმწიფოშია და პუტინის დამარცხებით რუსული იმპერიალიზმის საფრთხე არ მოისპობა.

აკაკი ბობოხიძე მოქალაქეებს მოუწოდებს დღეს კლასიკურ გიმნაზიასთან დაგეგმილ აქციას სახელწოდებით „იმოქმედე გენოციდის აღიარებისთვის“ შეუერთდნენ.

„დღეს, 21:00 საათზე, კლასიკური გიმნაზიის წინ რუსეთ-საქართველოს ომის 14 წლის თავზე გვექნება აქცია - „იმოქმედე გენოციდის აღიარებისთვის“. დღეს როგორც არასდროს გაგვიჩნდა შანსი დანარჩენი მსოფლიო დღევანდელ პრობლემებთან ერთად დავაფიქროთ საქართველოსა და ქართველი დევნილების პრობლემებზე. ბუჩამდე იყო აფხაზეთი და აფხაზეთის დროს არ იყო პუტინი, მსოფლიოს უნდა გავაგებინოთ, რომ პრობლემა არის არამხოლოდ პუტინში, არამედ რუსულ სახელმწიფოში და პუტინის დამარცხებით რუსული იმპერიალიზმის საფრთხე არ მოისპობა. ნებისმიერ ქართველს, რომელსაც სჯერა, რომ დღეს საქართველო უნდა იყოს აქტიური თავისი პრობლემების წარმოჩენის საქმეში მოვუწოდებთ, რომ მხარი დაუჭიროს ამ აქციას და თავისი მხარდასაჭერად მოვიდნენ აქ ჩვენთან ერთად“, - აღნიშნა აკაკი ბობოხიძემ.