რუსეთის მიერ ბირთვული რეაგირების ძალების გამოყენება, ქვეყნის სამხედრო დოქტრინის მიხედვით, შესაძლებელია მხოლოდ აგრესიის საპასუხოდ, ან იმ შემთხვევაში, როდესაც სახელმწიფოს არსებობას საფრთხე ექმნება. რუსული სახელმწიფო მედიის ინფორმაციით, ამის შესახებ რუსეთის საგარეო საქმეთა სამინისტროს ინფორმაციისა და პრესის დეპარტამენტის დირექტორის მოადგილემ ივან ნეჩაევმა განაცხადა.

„რუსული სამხედრო დოქტრინა ბირთვულ რეაგირებას უშვებს მხოლოდ აგრესიის საპასუხოდ, რა დროსაც გამოყენებული იქნება მასობრივი განადგურების იარაღი, ან როდესაც სახელმწიფოს არსებობას საფრთხე ემუქრება“, - განაცხადა ნეჩაევმა ხუთშაბათს გამართულ ბრიფინგზე და ხაზი გაუსვა, რომ ბირთვული არსენალის გამოყენება შესაძლებელია მხოლოდ თავდასხმაზე საპასუხოდ - თავდაცვისას, საგანგებო სიტუაციებში.

„ჩვენ გამოვდივართ იქიდან, რომ შეერთებულმა შტატებმა და ნატომ იციან, რა შედეგები შეიძლება მოჰყვეს მათ მიერ დაძაბულ ანტირუსულ რიტორიკას, ბირთვული იარაღის გამოყენების შესაძლებლობაზე აქცენტით“, - დასძინა მან.