აშშ-ის არმიის ყოფილი გენერლის, ბენ ჰოჯესის განცხადებით, არსებობს ნიშნები, რომ ყირიმის ნახევარკუნძულზე რუსეთის აეროდრომზე აფეთქებებისა და ოკუპირებულ ტერიტორიებზე უკრაინული არტილერიის მიერ საბრძოლო მასალის ათეულობით საცავსა და ქვედანაყოფებზე განხორციელებული დარტყმების შედეგად რუსეთის არმია სუსტდება.

„ეს აჩვენებს, რომ ისინი დაუცველები არიან და მათი ლოჯისტიკური სისტემა ამოწურულია. რუსებს საკმარისი ხალხი ან შესაძლებლობაც კი არ აქვთ თავიანთი ოპერატიული ლოჯისტიკის დასაცავად “, - განაცხადა ბენ ჰოჯესმა „დოიჩე ველესთან“ ინტერვიუში.

მისი თქმით, ყოველი წარმატებული დარტყმა საბრძოლო მასალის საცავზე ან სამეთაურო პუნქტზე, რუსეთის არმიას აიძულებს მომარაგების პუნქტები უფრო და უფრო უკან დახიოს, რაც სულ უფრო ართულებს საბრძოლო მასალის შეკეთებასა და აღდგენას.

„ისინი ვერ ახერხებენ ჩანაცვლებას. ბევრია ისეთი ნაწილი, რომელსაც სჭირდება რემონტი. ეს ნაწილები საიდანღაც უნდა მოვიდეს. ეს ყველაფერი კი ძალიან მყიფე, დაუცველი ლოჯისტიკური სისტემისთვის ტვირთია“, - აღნიშნა ბენ ჰოჯესმა.