2014 წლის მარტში რუსეთის მიერ ყირიმის ნახევარკუნძულის ოკუპაცია აგრესიის მიუღებელი აქტი და საერთაშორისო სამართლის მკაფიო დარღვევა იყო, - ამის შესახებ იტალიის პრემიერ-მინისტრმა, მარიო დრაგიმ, „ყირიმის პლატფორმის“ მეორე სამიტზე განაცხადა.

მანვე ყირიმის საერთაშორისო პლატფორმის ინიციატივისა და უკრაინისადმი იტალიის ურყევი მხარდაჭერა გამოხატა.

„იტალია მუდმივად გმობდა რუსეთის მიერ ყირიმის უკანონო ანექსიას და მოსკოვის მიერ ნახევარკუნძულის თანდათანობით მილიტარიზაციას. ჩვენ ღრმად შეშფოთებული ვართ ნახევარკუნძულზე ადამიანის უფლებების გაუარესებული მდგომარეობის გამო და ვდგავართ ყირიმელი თათრების თემის გვერდით, ძალადობისა და უსამართლობის წინააღმდეგ, რომლისგანაც ის იტანჯება“, - აღნიშნა დრაგიმ.

იტალიის პრემიერის თქმით, ყირიმისთვის ბრძოლა არის უკრაინის განთავისუფლების ბრძოლის ნაწილი.

როგორც მარიო დრაგიმ დასძინა, რუსეთმა უნდა შეწყვიტოს უკანონო ოკუპაცია, ისევე როგორც, მშვიდობიანი მოქალაქეების მიზანში სასტიკი ამოღება.

„იტალია გააგრძელებს უკრაინის მხარდაჭერას“, - დასძინა დრაგიმ.