„გირჩის” წევრის ალექსანდრე რაქვიაშვილის განცხადებით, ISFED-თან დაკავშირებულ საკითხზე ფოკუსირება ყურადღების გადასატანად დაიწყო, რათა სამუშაო ჯგუფებში არსებულ რეალურ პრობლემებზე საუბარი არ იყოს.

როგორც რაქვიაშვილმა ჟურნალისტებს განუცხადა, რეალურად, სამუშაო ჯგუფებში დისკუსია ტექნიკურ საკითხებს ეთმობა და არა ფუნდამენტურ თემებს.

"მთელი ეს ამბავი იმიტომაა დაწყებული, რომ ყურადღება გადავიტანოთ ამ საკითხზე იმის ნაცვლად, რომ ვისაუბროთ თუნდაც სამუშაო ჯგუფებში არსებულ პრობლემებზე. ბევრ შემთხვევაში დისკუსია მიდის უფრო ტექნიკურ საკითხებზე და ფაქტობრივად ფუნდამენტურ საკითხებს, მართლაც მნიშვნელოვან პრობლემებს არ ვეხებით. გასაგებია, რომ ISFED-ის შემთხვევა არაფერ შუაშია შინაარსობრივ ნაწილთან. როდესაც “ქართული ოცნება” კოლეგა ოპოზიციონერებს აკრიტიკებდა იმის გამო, რომ სამუშაო ჯგუფებში არ შემოდიან, საუბარი იყო, რომ ისინი იმის გამო არ შემოდიოდნენ, რომ “ქართული ოცნების” განსხვავებულ პოლიტიკურ პოზიციას არ ეთანხმებოდნენ. ახლა გამოვიდა, რომ “ქართული ოცნებაც” არ მუშაობს ვიღაცასთან, რადგან არ მოსწონს მისი პოლიტიკური პოზიცია. ეს ალოგიკურია და მიუთითებს იმაზე, რომ მიზეზი არის არა ISFED, არამედ ის, რომ ფოკუსი გაკეთებული იყოს არა პროცესზე, რომელიც ცუდად მიდის და არ მგონია სასურველ შედეგამდე მიგვიყვანოს, არამედ სხვა საკითხებზე. ჯერჯერობით ეს “ქართულ ოცნებას” გამოსდის”,- განაცხადა ალექსანდრე რაქვიაშვილმა.