უკრაინის წინააღმდეგობის მოძრაობამ დამოუკიდებლობის დღე დონბასის, ხარკოვისა და ხერსონის ოკუპირებული ქალაქების მოსახლეობას მიულოცა, - ინფორმაციას უკრაინული მედია ავრცელებს.

მათივე ცნობით, მოძრაობის აქტივისტებმა დამოუკიდებლობის დღის პატივსაცემად ოკუპირებული მარიუპოლის, მირნისა და ბალაკლეას თავზე უკრაინის დროშები აღმართეს.

„წინააღმდეგობის მოძრაობა დაუღალავ ბრძოლას აწარმოებს ჩვენი მიწების სწრაფად გასათავისუფლებლად და ასევე იმისთვის, რომ იქ მყოფმა თითოეულმა უკრაინელმა იგრძნოს, რომ უკრაინა აქ არის, ჩვენ ახლოს ვართ და მალე გავათავისუფლებთ ჩვენს მიწებს. წინააღმდეგობის მოძრაობა დამოუკიდებლობის დღეს გილოცავთ უკრაინის მარიუპოლიდან, ხერსონიდან, ხარკოვიდან, დონეცკიდან, ლუგანსკიდან და ყირიმიდან“, - ნათქვამია უკრაინის თავდაცვის სამინისტროს მთავარი სადაზვერვო სამმართველოს მიერ გავრცელებულ ინფორმაციაში.