მამუკა მდინარაძე - შეიძლება კანდიდატებზე უფრო მეტი პრობლემა შეგვხდეს - ვიმუშავებთ, რათა ომბუდსმენის მეტ-ნაკლებად მისაღები კანდიდატი იყოს არჩეული

კომპრომისების გზით კონსენსუსამდე უნდა მივიდეთ - ვიმუშავებთ, რათა მეტ-ნაკლებად მისაღები კანდიდატი იყოს არჩეული, - ამის შესახებ ფრაქცია "ქართული ოცნების" თავმჯდომარემ მამუკა მდინარაძემ ახალი სახალხო დამცველის არჩევასთან დაკავშირებით განაცხადა.

როგორც მდინარაძემ საპარლამენტო ოპოზიციის ნაწილთან შეხვედრის შემდეგ აღნიშნა, შეხვედრაში მონაწილე ოპოზიციონერთა შორის იყო აზრთა სხვადასხვაობა, თუმცა მათი ძირითადი მოთხოვნაა, სახალხო დამცველის არჩევის პროცესი იყოს ინკლუზიური და მაქსიმალურად იყოს გათვალისწინებული მასში არასამთავრობო ორგანიზაციების მონაწილეობა.

"მათი დიდი ნაწილი ამბობდა იმასაც, რომ პარლამენტის რეგლამენტის შესაბამისად სახალხო დამცველის კანდიდატურის წარმდგენი უნდა იყოს პოლიტიკური სუბიექტი - ფრაქცია ან პოლიტიკური ჯგუფი. ხვალ არასამთავრობო ორგანიზაციების პოზიციას მოვისმენ და დღის ბოლომდე ჩვენეულ ხედვას გაგაცნობთ, რათა პროცესი პროცესისთვის არ იყოს. რეალურ შედეგზე ორიენტირებული უნდა ვიყოთ, რომ ყველა პუნქტის შესრულება ვუზრუნველყოთ. რისკები უნდა გამოვრიცხოთ, რაც მხოლოდ მმართველ გუნდზეა არ არის დამოკიდებული. ის რაც მხოლოდ მმართველ გუნდზეა დამოკიდებული გარანტირებულად შესრულდება, მაგრამ ის რაც დამოკიდებულია კომპრომისზე, კონსენსუსზე და ოპოზიციის ჩართულობაზე, აქ მაქსიმალური ინკლუზიურობა უნდა დავდოთ. გულწრფელად რომ გითხრათ, ოპოზიციის ამ ნაწილთან პროცედურებზე შეიძლება უფრო მარტივად შევთანხმდეთ, ვიდრე კანდიდატებზე. მათ განსხვავებული აზრი და დამოკიდებულება აქვთ. მაგალითად, "ევროპელი სოციალისტები" ამბობდნენ, რომ წინა შემთხვევა უნდა გამოირიცხოს - მათ წინა შემთხვევად მიაჩნიათ ის, რომ სახალხო დამცველად პირდაპირ "ნაცი" დავსვით და ასეთი არ უნდა დაგვემართოს. სხვები სხვაგვარად თვლიან და აბსოლუტურად სხვა კრიტერიუმებზე საუბრობენ. შეიძლება კანდიდატებზე უფრო მეტი პრობლემა შეგვხდეს - უნდა ვცადოთ, რომ კონსენსუსამდე კომპრომისის გზით მივიდეთ და ყველა მხარის ინტერესი გავითვალისწინოთ", - განაცხადა მამუკა მდინარაძემ.

სახალხო დამცველის კანდიდატის შერჩევის წესთან დაკავშირებით საპარლამენტო პოლიტიკურ სუბიექტების ნაწილს შორის შეხვედრა გაიმართა. საპარლამენტო ოპოზიციიდან შეხვედრაში "გირჩის", "მოქალაქეების", "ევროპელი სოციალისტების" და პარტია "საქართველოსთვის" დეპუტატებმა მიიღეს მონაწილეობა. მმართველი გუნდან მათ მამუკა მდინარაძე და მიხეილ სარჯველაძე შეხვდნენ.

როგორც ცნობილია, ევროკომისიის ერთ-ერთი რეკომენდაცია სწორედ ახალი სახალხო დამცველის დანიშვნასთან დაკავშირებულ საკითხს ეხება. რეკომენდაციის თანახმად, ახალი სახალხო ომბუდსმენის წარდგენის პროცესში უპირატესობა უნდა მიენიჭოს დამოუკიდებელ პირს და პროცესი გამჭვირვალედ წარიმართოს, ასევე უზრუნველყოფილი იყოს ოფისის ეფექტური ინსტიტუციური დამოუკიდებლობა.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს