წალენჯიხის აღმშენებლობას მაინცდამაინც პოლიტიკური ნიშნით გაშვება სჭირდება? კიდევ როგორ ამართლებენ და „აპრავებენ“ თავიანთ საქციელს, - ასე აფასებს ფრაქცია „ქართული ოცნების“ თავმჯდომარე მამუკა მდინარაძე წალენჯიხის მერის გია ხარჩილავას მიერ რამდენიმე ადამიანის სამსახურიდან გათავისუფლებას.

მდინარაძის შეფასებით, წალენჯიხის მუნიციპალიტეტში ადამიანებთან აგდებული და ცინიკური დამოკიდებულება აქვთ, რაც მათ „ნაცურ“ მიდგომებზე მიუთითებს.

„ხალხის დაჩაგვრა და პოლიტიკური ნიშნით დევნა არის აუცილებელი პირობა, რომ რაღაც გაკეთდეს? წარმოიდგინეთ ქვეცნობიერში რა უდევთ. თუ წალენჯიხის მუნიციპალიტეტში ვინმე მათთვის პოლიტიკურად მიუღებელია და საწინააღმდეგო აზრებს აფიქსირებს, ისინი უნდა გაუშვან სამსახურიდან, რომ რაღაც გაკეთდეს? ადამიანებთან აგდებული და ცინიკური დამოკიდებულება აქვთ, ეს მათ „ნაცურ“ მიდგომებზე მიუთითებს“, - აღნიშნა მამუკა მდინარაძემ.

ცნობისთვის, „ქართული ოცნების“ თავმჯდომარე მამუკა მდინარაძის ინფორმაციით, წალენჯიხის მერმა, ადამიანები დაკავებული თანამდებობიდან მხოლოდ პოლიტიკური ნიშნით გაათავისუფლა და არცერთი სხვა კრიტერიუმით არ უსარგებლია.