რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდის აღმასრულებელი დირექტორის, დავით ტაბიძის განცხადებით, გარდაბნის მუნიციპალიტეტის სოფელ ნორიოს სკოლაში მოსწავლეები სწავლის განახლებას 2023 წლის მეორე სემესტრიდან შეძლებენ.

როგორც დავით ტაბიძემ ჟურნალისტებს განუცხადა, კომპანიასთან, რომელიც ნორიოს სკოლაში სამშენებლო სამუშაოებს ატარებდა, რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა, რამდენიმე კვირის წინ კონტრაქტი შეწყვეტა და ახალ ტენდერს გამოაცხადებს.

“სამწუხაროდ, ბოლო დღეებია გადის სიუჟეტი სკოლების მშენებლობა-რეაბილიტაციის პროგრამაზე, რომელის 2019 წლიდან მიმდინარეობს. დაუსრულებელ ობიექტის იმ კუთხით გაშუქება მოხდა, თითქოს სამუშაოები უხარისხოდ შესრულდა. სამუშაოები, რომლებიც მიღებული არ არის არ შეიძლება ითქვას ხარისხიანია თუ უხარისხო.

ჩვენი სურვილია, რომ რაც შეიძლება სწრაფად დავასრულოთ ნებისმიერი ობიექტი, მაგრამ არსებობს ობიექტური გარემოება. ნორიოს სკოლაზე რამდენიმე კვირის წინ იყო მიღებული საბოლოო გადაწყვეტილება, რასაც კონტრაქტის შეწყვეტა ჰქვია. ეს ინფორმაცია იყო ღია.

ნორიოს სკოლაში სამშენებლო სამუშაოების 65% შესრულებული იყო. ამ კონკრეტულ შემთხვევაში ჩვენ შეგვხვდა მშენებელი, რომელმაც სამუშაოები შეაჩერა. მიუხედავად წერილობითი გაფრთხილებისა პროგრესი ვერ დავინახეთ. ფონდის გუნდის ყველა წევრმა ბევრი იშრომა, იმისათვის რომ ეს შედეგი არ დამდგარიყო, სამწუხაროდ, დადგა ეს შედეგი. კონტრაქტი გაწყვეტილია მშენებელ კომპანიასთან. შემდეგ კვირას ახალ ტენდერს გამოვაცხადებთ. კომპანიას, რომელმაც სამშენებლო პროცესი შეწყვიტა კონტრაქტით გათვალისწინებულ ყველა გარანტიაზე პასუხისმგებლობა დაეკისრება. სკოლა 2023 წლის მეორე სემესტრიდან იქნება მზად”,- განაცხადა ტაბიძემ.

რაც შეეხება ახალსოფლის სკოლას, ტაბიძის თქმით, ამ ეტაპზე გამაგრებითი სამუშაოები მიმდინარეობს და რის გამოც სკოლაში მიმდინარე სამუშაოები ნოემბერში დასრულდება.

“არის ობიექტური მიზეზი, რის გამოც სამუშოების დასრულება ახალსოფელში გადაიწია ერთი ან ორი თვით. სკოლაში სარემონტო სამუშაოები მიმდინარეობს, მშენებელი ობიექტზეა. ამ სკოლაში დემონტაჟის მერე დავიწყეთ ცვლილებითი სამუშაოები იმ მიზნით, რომ უნდა მივიღოთ თანამედროვე სტანდარტის სკოლა, რომელსაც ექსპლუატაციის ვადა უნდა ჰქონდეს მინიმუმ 30 წელი. შესაბამისად, სწრაფად და ხარისხიანად ლოგიკაში ვერ ჯდება. ეს იყო მიზეზი თუ რატომ არ არის 1-ელი სექტემბერისთვის სამუშაოები დასრულებული. მშენებელი იქ, სადაც შეუძლია მუშაობა, მუშაობს, ამ ფაქტს ხედავენ ადგილობრივები. მაგრამ გვაქვს რამდენიმე ნაწილის გამაგრების პრობლემა. ეს საკითხი დამუშავებას ექვემდებარება და 2-3 კვირაში გადაწყვეტილება მიღებული იქნება. დარჩა 1 თვის სამუშაოები. ძირითადი ნაწილი სამუშაოების უკვე დასრულებულია”,- განაცხადა ტაბიძემ.

მისი თქმით, ფონდიდან განათლების სამინისტროს ყოველთვიურ რეჟიმში მიეწოდება ინფორმაცია, რომ მოსწავლეების სხვა სკოლაში გადაყვანა პროცესი მათი მხრიდან დარეგულირდეს.

ამასთან, დავით ტაბიძის განცხადებით, 2019 წლის სკოლების მშენებლობა-რეაბილიტაციის პროგრამის ფარგლებში, 163 სკოლის რეაბილიტაცია-მშენებლობის პროექტიდან, დღეის მდგომარეობით, დასრულებულია 106 სკოლის მშენებლობა-რეაბილიტაცია, ხოლო მიმდინარე წლის ბოლომდე დაგეგმილია დამატებით 39 სკოლის რეაბილიტაცია-მშენებლობის დასრულება.

როგორც ტაბიძემ ჟურნალისტებს განუცხადა, დარჩენილი მიმდინარე პროექტებიდან, 11 პროექტის დასრულება ხელშეკრულებით, 2023 წელს არის გათვალისწინებული.