სპეციალურ საგამოძიებო სამსახურში სახელმწიფო უსაფრთხოების სამსახურის უფროსის ყოფილი მოადგილის, სოსო გოგაშვილის მეუღლე თეა მარტყოფლიშვილი გამოიკითხა.

როგორც დაკითხვის შემდეგ სოსო გოგაშვილის მეუღლემ განაცხადა, გამოძიებას კითხვები მის მიერ გაკეთებულ განცხადებაზე ჰქონდა, სადაც მან განაცხადა, რომ სოსო გოგაშვილის დაკავების ოპერაციაში სხვადასხვა უწყების მაღალჩინოსნები მონაწილეობდნენ, მათ შორის შს მინისტრის მოადგილე შალვა ბედოიძე.

„გამომძიებელმა დამისვა კითხვები თუ როგორ ამოვიცანი შალვა ბედოიძე და მას მე ყველა დეტალი ავუხსენი, ავუხსენი როგორ აღვიდგინე შალვა ბედოიძე. ვიძახი ყოველთვის, რომ ეს არის ფორმალური დაკითხვა და ამას არანაირი რეაგირება არ მოჰყვება იმიტომ, რომ ისინი საკუთარ თავებს არ დაიჭერენ. ამიტომ ვაგრძელებთ ჩვენ სტრასბურგში ბრძოლას, რომ იქ დავამტკიცოთ ჩვენი უდანაშაულობა“, - განაცხადა თეა მარტყოფლიშვილმა.