თუ რაიმე კონკრეტული შეიძლება გაკეთდეს პარლამენტის მიერ მათ შორის კანონის მიღების კუთხით, ნებისმიერ დროს მზად ვართ, განვიხილოთ ნებისმიერი ინიციატივა, - ამის შესახებ პარტია „ქართული ოცნების" თავმჯდომარე ირაკლი კობახიძემ ფემიციდთან დაკავშირებით განაცხადა, რითაც გამოეხმაურა ოპოზიციონერი ქალი დეპუტატების მიერ დღეს, პარლამენტში ამ საკითხზე გაკეთებულ განცხადებას.

კობახიძის თქმით, ქალებზე ძალადობის საკითხს უკავშირდება სწორედ ევროკავშირის 12 რეკომენდაციიდან ერთ-ერთი.

"ამისთვის სტრუქტურებიც არის შექმნილი საქართველოს პარლამენტში, 12 დან ერთ-ერთი პუნქტი უკავშირდება მათ შორის ძალადობის, ფემიციდის საკითხებს, არის გენდერული საბჭო ჩამოყალიბებული, რომელიც აქტიურად მუშაობს როგორც ამ პუნქტზე, ასევე, ზოგადად ამ თემაზე. ჩვენ დაველოდებით ინიციატივებს, თუ რაიმე კონკრეტული შეიძლება გაკეთდეს პარლამენტის მიერ მათ შორის კანონის მიღების კუთხით, ნებისმიერ დროს მზად ვართ, განვიხილოთ ნებისმიერი ინიციატივა",- განაცხადა კობახიძემ.

პარლამენტში გამართულ ბრიფინგზე ქალმა დეპუტატებმა მამაკაც პოლიტიკოსებს და გადაწყვეტილების მიმღებ პირებს მოუწოდეს პრიორიტეტად გამოაცხადონ ფემიციდის პრობლემის წინააღმდეგ ბრძოლა. ბრიფინგი ფემიციდის პრობლემასთან დაკავშირებით ოპოზიციონერმა დეპუტატებმა - ანა ნაცვლიშვილმა, თამარ კორძაიამ, ანა ბუჩუკურმა, თეონა აქუბარდიამ, ხათუნა სამნიძემ და ანა წითლიძემ გამართეს.