ბრიტანეთი მის გამო დღეს დიდებული ქვეყანაა, - ამის შესახებ დიდი ბრიტანეთის ახალმა პრემიერ-მინისტრმა ლიზ ტრასმა დაუნინგ სტრიტზე, საკუთარ რეზიდენციასთან ელისაბედ მეორის გარდაცვალების შემდეგ განაცხადა.

„ახლა ჩვენ ვართ თანამედროვე, წარმატებული, დინამიური ქვეყანა. დედოფალმა ელისაბედ II-მ მოგვცა სტაბილურობა და ძალა, რაც გვჭირდებოდა. არაჩვეულებრივი მიღწევაა 70 წლის განმავლობაში ასეთი ღირსებითა და სათნოებით ხელმძღვანელობა. გაერთიანებულ სამეფოსა და მთელ მსოფლიოში ხალხს ის უყვარდა და მათ აღფრთოვანებას იწვევდა. ის ჩემთვის და მრავალი ბრიტანელისთვის პირადი შთაგონების წყარო იყო”, - აღნიშნა ტრასმა.

დიდი ბრიტანეთის პრემიერ-მინისტრმა საკუთარი მიმართვა დაასრულა მოსახლეობისადმი მოწოდებით, რომ გაერთიანდნენ ისინი ბრიტანეთის ახალი მეფის, ჩარლზის ირგვლივ.

„ღმერთო დაიფარე მეფე“, - დასძინა ტრასმა.

დიდი ბრიტანეთის დედოფალი ელისაბედ მეორე 96 წლის ასაკში გარდაიცვალა.